Poetry Project #4 Tulnek ken Uged

30-Day Poetry Project #4: Tulnek ken Uged

I apologize folks, there won’t be English translations for a while. But as soon as I get through this training program in Dallas, I’ll update these poems.

Poetry #4 Tulnek ken Uged

.
Ditoy ti pangrugiam
No adda kayatmo a papanam
Ugedam…
_______________
Tugkelam.
Umuli ka pay a. Mabalin met.

Di ket amin a bituen
Ken amin a pagtaudan ti lawag
Agpapadada a tulnek
Iti tangatang.
Ket no kitaem dagiti pagsasabatan
Dagiti tulnek a naugedan
Mabasam
Ti masakbayan ken ti sapot-sapot
A maaw-awagan iti gasat.

Ania kad’ ti Scorpio
Ti Capricorn wenno Big Dipper
No di met laeng tulnek ken nagsasallupang
nga uged iti tangatang

.
Ditoy ti pangrugiam
No adda daliasat nga inka
Isayangkat.
Ugedam ti dalan a pagnaam
Iti mapa. Wenno saan
Yunnatmo ta tammudom ket bay-am
Pagkonektaranna dagiti tulnek
Ti daga ken dagiti tulnek iti tangatang
Amangan ketdi no daytoy a dalan
Ti pagnaam agturong
Iti masakbayam.

Ditoy ti pangrugiam
No adda kayatmo a papanan
Ugedam…
_______________
Ditoyto met laeng ti pagtungpalam
.