Poetry #8 Estatwa iti Kalye Kanluran

Lumlumgaken ti init
ngem nasileng latta
ti bronse a kudil

ti estatwa

iti nagsabatan ti Kalye Timog
ken Kalye Kanluran

Adayo ti kalye ti Daya
ngem daytoy estatwa
Kanluran ti sangsangoenna.

Nakangato ti makannigid nga imana
kasla padi a mangaskasaba
mangmismisa kadagiti Pilipino
a kadawyanen nga agdadanggay
nga agdaydayaw
wenno agpatalaw
iti pangulo ti pagilian.
Nakaiggem met ti kannawan
nga imana iti libro, Biblia ngata
wenno Konstitusion
awan ti makaibaga.

Daytoy nga estatwa
dakdakkel ngem iti biag
daydi Pilipino a natay
a padpadayawan ita.

Pinaltuganda idi apaman
a nakadissaag manipud
eroplano a naggapu
Estados Unidos.

Nalagipna ngata ni Quezon
a nangibaga a kaykayatna nga amang
ti agbiag iti sinan-impierno
a pagilian
no la ketdi Pilipino ti mangidaulo
ngem iti paraiso dagiti Amerikano.

Sangagasuten a tawen ti napalabas
sipud idi panawenna.

Adtoy metten ti sinan-impierno
a pagilian. Pagturayan
dagiti dadaulo
a kasla sairo.

Sadinno ti ayan
dagiti natakneng a dadaulo?
Sadinno ti ayan dagiti
pudno a pangulo?

Lumlumgaken ti Init
ngem addada dita
nasileng latta ti bronse
a kudilda, nakatakder
natakneng nga estatwa
iti nagsabatan ti Kalye Timog
ngem sangsangoenda
Ti Kalye Kanluran.

image credit: pinoycentric

Tags: ilocano poems, ilocano poetry, ilokano poems, ilokano poetry