Diskoneksion

Simmangpet ti electric bill
Nakaimalditan ti utang–
nasurok talloribu a piso
Daytat’ balor ti lawag
a nausarta.

Tallo bulan ti diak nabayadan
No mabalin laeng nga agbiag
iti sipnget
tunggal rabii.
No mabalin laeng nga urnongen
ti lawag dagiti bituen
nga inkarik idi.
Nalabit masapul
a buttawan ti atep
tapno makastrek ti lawag
ti bulan.

ngem saan!
ngem saan…

tallo lawas ti pawayway
tapno marisutko ti pannakaguted
ti linya
ti kuryente
dagiti linya a namagkonekta
kadata.

Adut’ kawad ti koryente
ditoy balay

Adut’ kawad ni ayat
iti nagbaetanta

Ngem dagiti saksakan
a padasek nga usaren
Natayda met aminen.

image credit: Jake Mates via Flickr