Iti Likudan dagiti Napuskol a Tawa

Ilukaismo
dagita kurtina
Bay-am ta lam-ek nga agkaradap
Ditoy uneg.

Naibukboken ti langit Ti amin a niebe a kabaelanna a yetnag
Natay metten amin a bulong
Dagiti kaykayo
(malaksid kadagiti Pine Trees)
Agpakpakaasi
iti panagsubli dagiti berde
a maris ti kalgaw.

Ngem di mo met marikna
ti lam-ek a yeg
ti angin nga aggapu Canada
wenno Siberia ngata
ta napuskol
napuskol ti kawesmo
ken napuskolen ti ules
a nangbalkot dita pusom.

Ilukaismo
dagita kurtina
Iwarasmo ti panagkitam
dita ruar.

Mailasinmo kadi pay
ti aglawlaw? Wenno
nagbalin metten a ganggannaet
ti paraangam ken toy pagnaedam?

Ilukaismo
dagita kurtina
a nangabbong dita tawa
ti puso ken panunotmo.

image credit: kwang via flickr